Fyrsta ár ferlisins miðar að því að búa til aðgerðaáætlun fyrir innleiðingu Barnasáttmálans í sveitarfélaginu. Sveitarfélag sem ætlar að sækja um viðurkenningu sem barnvænt sveitarfélag bókar fund með starfsfólki UNICEF þegar aðgerðaáætlunin er tilbúin. Starfsfólkið skráir hjá sér athugasemdir meðan á fundinum stendur, en hann er hluti af mati samtakanna á því hvort sveitarfélagið fái viðurkenningu sem barnvænt sveitarfélag. Markmið fundarins er að tryggja að undirbúningsvinnan sé í samræmi við forsendur verkefnisins.
Áður en vinna hefst við gerð aðgerðaáætlunarinnar hefur stýrihópurinn:
- Framkvæmt ítarlega kortlagningu á velferð og réttindum barna innan sveitarfélagsins.
- Átt samráð við börn og ungmenni.
- Svarað gátlistum sem fylgja grundvallarforsendum barnvænna sveitarfélaga.
Það borgar sig að hafa eftirfarandi þætti í huga við gerð aðgerðaáætlunarinnar:
- Skýr markmið.
- Afmarkaðar aðgerðir sem miða að því að ná markmiðunum.
- Skilgreinda ábyrgðaraðila með hverri aðgerð.
- Tímaáætlun.
- Hlutverk og þátttaka barna og ungmenna í framkvæmdinni séu vel skilgreind.
Þar að auki er mikilvægt að hafa í huga:
- Hvernig matslisti UNICEF er uppbyggður og hvernig samtökin leggja mat á aðgerðaáætlunina að innleiðingarferlinu loknu.
- Hvers konar stuðning börn og ungmenni þurfi til að geta tekið þátt í innleiðingunni?
- Hvernig eigi að upplýsa íbúa sveitarfélagsins um verkefnið og hver/hverjir beri ábyrgð á því.