5.skref - Framkvæmd

Í kjölfar þess að sveitarstjórn samþykkir aðgerðaáætlunina hefst vinna við að koma áætluninni í framkvæmd. Líkt og á fyrri stigum er mikilvægt að hugað sé að því hvernig börn og ungmenni geti með sem fjölbreyttustum hætti tekið þátt í innleiðingarferlinu.

Framkvæmd aðgerðaáætlunar

Stýrihópurinn heldur utan um framkvæmd aðgerðaáætlunarinnar í samstarfi við sveitarstjórn og þau svið/stofnanir sem áætlunin snertir. Stýrihópurinn sér jafnframt til þess að sveitarstjórn, starfsfólk og íbúar sveitarfélagsins séu upplýst um framgang verkefnisins. Þarna er ekki síst mikilvægt að stýrihópurinn tryggi að börn og ungmenni hafi aðgang að upplýsingum um innleiðinguna og geti komið sjónarmiðum sínum á framfæri. Einnig skiptir máli að stýrihópurinn hafi í huga hvernig stuðlað sé að þátttöku barna og ungmenna í þeim aðgerðum sem aðgerðaáætlunin nær til, sérstaklega ungmennaráð sveitarfélagsins.

Barnaskýrsla

Mat á því hvort sveitarfélag fái viðurkenningu sem barnvænt sveitarfélag byggir m.a. á því að sveitarfélag skili sérstakri barnaskýrslu til UNICEF við lok innleiðingarferlisins.

Skýrslugerðin er tilvalið verkefni fyrir ungmennaráð sveitarfélagsins. Gott er að hefja gagnasöfnun fyrir skýrsluna þegar í upphafi þessa skrefs.

Skýrsluhöfundarnir ráða sjálfir á hvaða formi þeir skila skýrslunni, hún getur verið sett fram sem myndasýning, myndband, dagbækur – eða blanda af ólíkum miðlum.