Um verkefnið – Barnvæn sveitarfélög

Í kjölfar lögfestingar Barnasáttmálans á Íslandi 2013 hefur eftirspurn eftir fræðsluefni og stuðningi við innleiðingu sáttmálans aukist til muna. Á það ekki síst við sveitarfélögin, sem sinna stærstum hluta þeirra verkefna sem hafa beina tengingu við daglegt líf barna og ungmenna. Til að svara þessari eftirspurn hóf UNICEF á Íslandi, í samstarfi við umboðsmann barna, að búa til líkan fyrir innleiðingu Barnasáttmálans innan íslenskra sveitarfélaga – líkan sem við kjósum að kalla barnvæn sveitarfélög.

Fyrirmyndin

Hugmyndafræði barnvænna sveitarfélaga byggir á alþjóðlegu verkefni UNICEF, Child Friendly Cities (CFC), sem hefur verið innleitt í hundruðum sveitarfélaga út um allan heim frá 1996. Íslenska líkanið byggir jafnframt á efni frá umboðsmönnum barna í Noregi og Svíþjóð og UNICEF í Finnlandi.

Mánudaginn 17.október kynntu UNICEF á Íslandi og umboðsmaður barna verkefnið Barnvæn sveitarfélög, innleiðingarlíkan og vef (www.barnvaensveitarfelog.is) sem styður sveitarfélög í innleiðingu Barnasáttmála Sameinuðu þjóðanna. Kynningin fór fram á Akureyri í fundarsal bæjarstjórnar sveitarfélagsins. Hugmyndafræði verkefnisins byggir á alþjóðlegu verkefni UNICEF, Child Friendly Cities, en það hefur verið innleitt í hundruðum sveitarfélaga um allan heim. Sveitarfélög sem taka þátt og innleiða Barnasáttmálann geta hlotið viðurkenningu sem barnvæn sveitarfélög frá UNICEF á Íslandi.

Akureyri verður fyrsta sveitarfélagið á Íslandi til að nýta sér líkanið og tekur þátt í tilraunaverkefni í þróun þess til tveggja ára í samstarfi við UNICEF á Íslandi.

Þátttaka

Á þessum vef geta áhugasamir einstaklingar, kjörnir fulltrúar og starfsfólk sveitarfélaga nálgast allar nauðsynlegar upplýsingar um innleiðingu Barnasáttmálans. Þau sveitarfélög sem hafa áhuga á að hefja formlegt ferli við innleiðingu sáttmálans, og gerast þannig barnvæn sveitarfélög, geta sent hér inn umsókn um þátttöku. Ferlið við að gerast barnvænt sveitarfélag krefst pólistískrar skuldbindingar, sem er grundvöllurinn fyrir innleiðingu Barnasáttmálans í sveitarfélaginu, ásamt samræmdum aðgerðum þvert á öll svið sveitarfélagsins.

Innleiðingarferlið

Innleiðingarferli barnvænna sveitarfélaga tekur tvö ár og skiptist í 8 skref sem sveitarfélag stígur, með það að markmiði að virða og uppfylla réttindi barna. Að tveimur árum liðnum, getur sveitarfélag sótt um viðurkenningu, frá UNICEF á Íslandi. Viðurkenningin er háð því að starfsfólk UNICEF meti sem svo að innleiðingarferlið hafi verið réttindum barna í sveitarfélaginu til framdráttar og að aðgerðaráætlun verkefnisins hafi verið fylgt eftir. Til að viðhalda viðurkenningunni þarf sveitarfélag að halda innleiðingunni áfram, setja sér ný markmið og óska eftir nýju mati að tveimur árum liðnum.

Frekari upplýsingar

Ef óskað er frekari upplýsinga eða kynningar á barnvænum sveitarfélögum biðjum við áhugasama um að senda tölvupóst á umsjónarmann verkefnisins, Hjördísi Evu Þórðardóttur – réttindafræðslufulltrúa UNICEF á Íslandi.