Markmiðum í aðgerðaáætluninni þurfa að fylgja skýrar og tímasettar aðgerðir ásamt yfirliti yfir ábyrgðaskiptingu þeirra. Þegar tilteknu markmiði/aðgerð er náð ætti að uppfæra aðgerðaáætlunina með upplýsingum um mælanlegan árangur, ef við á.
Hér til hliðar má nálgast minnislista sem leiðbeinir stýrihópnum við gerð aðgerðaáætlunarinnar.
Upplýsingagjöf
Samhliða gerð aðgerðaáætlunar skipuleggur stýrihópurinn miðlun upplýsinga til íbúa og starfsmanna um framgang verkefnisins. Huga þarf að því að upplýsa börn og ungmenni um verkefnið. Stýrihópurinn útbýr auðlesna útgáfu af aðgerðaáætluninni sem er kynnt börnum sérstaklega.
Eftirfylgnifundur með UNICEF
Þegar aðgerðaáætlunin er tilbúin óskar stýrihópurinn eftir fundi með starfsfólki UNICEF. Þetta á þó eingöngu við um þau sveitarfélög sem ætla að sækja um viðurkenningu sem barnvæn sveitarfélög. Tilgangur fundarins er að tryggja að þróun verkefnisins sé í samræmi við viðmið barnvænna sveitarfélaga, sem er ein af forsendum viðurkenningar sem barnvænt sveitarfélag. Á fundinum er farið í gegnum aðgerðaáætlunina og undirbúningsvinnuna í skrefum 1-3. Fulltrúi UNICEF gefur álit sitt á aðgerðaáætluninni og þróun hennar, með tilliti til hugmyndafræði barnvænna sveitarfélaga. Samráðshópurinn undirbýr sig fyrir fundinn með því að fara í gegnum matslista frá UNICEF. Það er ekki nauðsynlegt að svara spurningunum skriflega en fulltrúi UNICEF mun skrá svör stýrihópsins hjá sér á fundinum.
Aðgerðaáætlunin samþykkt af sveitarstjórn
Þegar aðgerðaáætlunin er tilbúin er hún send sveitastjórn til samþykktar. Mikilvægt er að um áætlunina ríki þverpólitísk sátt, svo hún verði ekki bitbein ólíkra pólitískra fylkinga.
Samantekt - 4. skref
Hvað gerir sveitarfélagið?
• Samráðshópurinn býr til aðgerðaáætlun þar sem fram koma markmið og aðgerðir sveitarfélagsins í tengslum við innleiðingu barnasáttmálans. Í aðgerðaáætluninni er tilgreint hvernig upplýsa eigi íbúa sveitarfélagsins um verkefnið.
• Stýrihópurinn gerir auðlesna útgáfu af aðgerðaáætluninni sem er sérstaklega kynnt börnum og ungmennum.
• Sveitarstjórn samþykkir aðgerðaáætlunina.
Hvaða stuðning getur UNICEF veitt á þessu stigi?
• Eftirfylgnifundur er haldinn þar sem fulltrúi UNICEF gefur álit sitt á aðgeðaráætlun sveitarfélagsins og undirbúningi hennar í skrefum 1-3. Þetta á eingöngu við um sveitarfélög sem ætla að sækja um viðurkenningu sem barnvæn sveitarfélög.
• UNICEF getur veitt stýrihópnum ráðgjöf eftir þörfum.