6.skref - Skýrsla

Sveitarfélög sem ætla að sækja um viðurkenningu sem barnvæn sveitarfélög skila skýrslum til UNICEF um framgang verkefnisins. Hér að neðan eru frekari upplýsingar um skýrslurnar og matsferlið sem fer af stað þegar þeim hefur verið skilað.

Lokaskýrsla

Þegar aðgerðaáætlun sveitarfélagsins telst uppfyllt (miðað við tveggja ára innleiðingartíma að lágmarki) skilar sveitarfélagið skýrslu til UNICEF um framgang verkefnisins. Í skýrslunni er lagt mat á hvernig hafi gengið að uppfylla aðgerðaáætlunina og hvort sveitarfélagið hafi uppfyllt þær kröfur sem gerðar eru til barnvænna sveitarfélaga. Í skýrslunni gerir sveitarfélagið grein fyrir þeim þáttum innleiðingarferlisins sem gengu vel og þeim sem hefðu mátt ganga betur.

Barnaskýrsla

Barnaskýrslunni sem lýst var í 5. skrefi er skilað til UNICEF (á eingöngu við um sveitarfélag sem ætlar að sækja um viðurkenningu sem barnvænt sveitarfélag). Í skýrslunni segir ungmennaráð sveitarfélagsins frá þátttöku barna og ungmenna í innleiðingarferlinu og leggur mat á áhrif verkefnisins á börn.

Lokafundur með UNICEF

Eftir að skýrslunum hefur verið skilað til UNICEF fer fram skilafundur þar sem farið er yfir þær ásamt matslista barnvænna sveitarfélaga. Stýrihópurinn undirbýr hann með því að lesa í gegnum listann, ekki þarf að svara spurningunum á listanum skriflega. Á fundinum fara starfsmenn UNICEF í gegnum matslistann og meðlimir stýrihópsins segja frá innleiðingarferlinu, framkvæmd aðgerðaáætlunarinnar og hvort markmiðum hennar hafi verið náð. Ef breytingar voru gerðar á aðgerðaáætluninni á tímabilinu segir stýrihópurinn frá því á fundinum og útskýrir af hverju.

Ef einhverjum markmiðum eða aðgerðum í aðgerðaáætluninni var gefinn lengri tímarammi en 2 ára innleiðingarferlið er það einnig tilgreint á fundinum.